OK, denn chunt dä Matchbricht halt doch no am Sunntigobig. Morn hani kei Ziit. Aber defür chunt er uf Schwiizerdütsch, schliesslich isch es en wichtige Tag gsi fürd Schwiiz. Chli weniger wichtig mag do dä Match vo üsne Fraue amuete, aber für üs bedüüteds d'Welt, mitenand chöne Fuessball z'spiele, und vonere FCM-Wand unterstützt z'werde, wie au hüt wieder in Rhynegg, wo d'FCM-ler klar i dä Überzahl gsi sind. Am Schluss hämmer mit eme recht souveräne 2:0 wiiteri drü Spöh chöne hole, aber das isch alles andere als eifach gsi.
D'Hanna hät zwor dä Schnaps abglehnt, aber susch händ üsi Fraue d'Vorgobe und üsi Ideeä sehr guet umgsetzt. Mir händ gwüsst, dass Rhynegg ä sehr ä stabili Mannschaft isch. Es wird Geduld bruche. Und so isch es denn au cho. D'Melä isch noch 3 Minute scho uf dä Goalie losgstürmt, aber leider hämmer nonig chöne i Füehrig go.
Will dä Goalie ebe guet reagiert hät.
<--
Aber noch 16 Minute isch es denn sowiit gsi. D'Katja hät d'Dalia uf links lanciert, und üsen Elfer isch mit viel Zug a dä Verteidigerin verbiizoge. Ihri Flanke isch perfekt gsi, und d'Melä hät nur no müesse in Ball inelaufe und häts so s'1-0 für dä FCM chöne erziele. Es isch verdient gsi, will Münsti hät i dä erste Viertelstund sicher meh fürs Spiel gmacht. Und me hät nöd s'Gfühl gha, dass de FCM nohloh wird. Münsti isch di besser Mannschaft gsi, und heet scho vor em Pausepfiif chöne s'zweite Goal mache, aber entweder simmer z'wenig entschlosse gsi oder d'Rhynecker Abwehr hät chöne kläre. So simmer denn mit eme knappe 1-0 id Pause und di eint oder ander hät scho gmerkt, dass es no langi 45 wiiteri Minute chönted werde.
Das isch zwor es Bild us dä erste Halbziit, womer uf en Eckball warted. Aber es isch au sinnbildlich für dä Beginn vo dä zweite Halbziit, will d'Mela hät i dä Pause ä neui Taktik festgleit, wenn mir en Eckball händ. Es isch nöd lang gange, do hämmer tatsächlich eine chöne spiele, aber meh als d'Gegnerin über dä Huufe renne hämmer leider nöd chöne us däre Situation usezieh. Jänu, mir händ jo no es bitzeli Ziit. Und die Ziit isch sehr schnell vergange, scho bald hät d'Azeigetafle 70 Minute azeigt und dä FCM hät no immer mit 1-0 gfüehrt. Dä FC Rhynegg hät jetzt versuecht, echli offensiver z'cho, hät aber immer müesse ufpasse, nöd inen Konter vom FCM inezlaufe.
Do ischer, dä Konter! Aber me gsehts i dä Gsichter vo üsne Fraue, dä Schiedsrichter hät uf Abseits entschiede. Dörf nöd wohr si! Schad, das isch eine vo dä ganz wenige Fehlentscheidige gsi, wo dä würklich gueti Schiedsrichter Leandro gfällt hät. So isch es wiiterhin 1-0 gsi und irgendwenn muess es doch klappe mit dem cheibe zweite Goal. Zumol mir hine würklich sehr guet gstande sind und Rhynegg relativ wenig Chance uf dä Usglich gha hät. Mir händ denn au no chöne en Freistoss usere gföhrliche Position schüsse, sind aber au so nöd zum Erfolg cho. Und je länger sone Spiel goht, desto meh Muet fasst sich dä Gegner und es isch scho oft passiert, dass us irgend enere Situation denn no es Goal fallt. Aber nöd so am hütige Sunntig. Im Gegeteil. Üsi Fraue händ i dä 83. Minute chöne dä Match entscheide.
GOOOOOOOOAL! D'Dalia hät en eigentlich verlorene Ball uf dä rechte Siite wieder scharf gmacht und irgendwie hät sie's gschafft, de Ball uf dä zweite Pfoste z'bringe, wo d'Melä mit letschtem Iisatz dä Ball us 4 Meter über d'Linie hät chöne drucke. D'Dalia häts nöd mitübercho und hät zerscht vo dä Mela wieder müesse wachküsst werde, aber denn hämmers alli realisiert - 2:0 Münsti, grosse Jubel am Spielfeldrand und natürlich au uf em Feld. Münsti hät denn di langi Nochspielziit souverän abegspielt und dörf sich am End über drü sehr verdienti Pünkt freue und chletteret i dä Tabelle wiiter. Au di dritt Halbziit isch lässig gsi, üsi Sponsorin Trudi hät sich über üsen Bsuech gfreut.
Ez trainieremer wiiter und gönd denn uf Wil ufe, womer geg dä Ufstieger spieled. Däne ihri erst Mannschaft (NLB) hät spielfrei, mol luege was üs erwartet. Mir werdeds gseh.
Bilder: Goran Sovric und Philipp Egli (Danke vielmol!)
FC Rheineck - FC Münsterlingen 0:2 (0:1)
DANKE LIEBI FCM-FANS ♥